Olga prej letre. Një udhëtim i jashtëzakonshëm
Olga prej letre. Një udhëtim i jashtëzakonshëm
Elisabetta Gnone
Përktheu: Albana Nexhipi
304 faqe
900 lekë
Olga Papeli është një vajzë hollake si degëz dhe ka një talent të veçantë: di të rrëfejë histori të pabesueshme, të cilat thotë se i ka jetuar vetë dhe ku mund të ndodhë që një baldosë të flasë, një lepur të jetë lundërtar dhe një ari të bëhet rrobaqepës. Të vërteta? Të sajuara? Tomeoja e mençur, berberja e fshatit, thotë se Olga i krijon historitë e saj rreth fantazmave të fëmijërisë për të mposhtur frikën. Prandaj historitë e Olgës janë aq të suksesshme: sepse ato mposhtin përbindëshat nga të cilët, në të vërtetë, tremben të gjithë, të mëdhenj e të vegjël. Një ditë prej ditësh, për të ngushëlluar mikun e saj Larvin, që është shumë i brishtë, Olga vendos t’i tregojë historinë e Olgës, vajzës prej letre, që la fshatin në kërkim të magjistares Auzolia, e cila do ta kthente në një fëmijë si gjithë të tjerët, prej mishi e kocke. Udhëtimi ishte i gjatë dhe plot aventura: Olga takoi një shitës gjurmësh, udhëtoi së bashku me një djalosh që jetonte në një balonë dhe me një tjetër që e kaloi përtej detit, duke vozitur. Rrezikoi jetën shumë herë, humbi mes një pylli, por trupa e një cirku me artistë interesantë e gjeti. Dhe vetëm më në fund, kur takoi magjistaren, vajza prej letre e kuptoi se sa shumë gjëra ia kishte dalë mbanë të bënte…
Kjo është një ndodhi e vërtetë. Është ndodhia se si në fund, Ariu i stërvitur i zotit Xhubat më preu mes përmes dhe Burreci me sustë më ngjiti me shirit skoçi. Ai mban gjithmonë një rrotull të tillë me vete, sepse hera-herës i qëllon të shqitet nga fundi i kutisë dhe të bjerë jashtë. Gruaja fluturuese deshi të më jepte një prej leukoplasteve të veta, por unë i thashë se, kur të presin më dysh, nevojitet diçka më e fortë për të të mbajtur bashkë.
Rreth autorit
Elisabetta Gnone
Elisabetta Gnone ka lindur në Xhenova, Itali. Ka drejtuar disa revista për gratë dhe revista për fëmijë të Walt Disney, për të cilin më 2001 krijoi serinë vizatimore W.I.T.C.H., me sukses botëror. Më 2004, botoi librin e parë të sagës shumë të suksesshme Fairy Oak, që pushtoi zemrat e miliona lexuesve të rinj anembanë botës. Vitet e fundit, Elisabetta iu përkushtua shkrimit të romanit të saj të ri Olga prej letre, një histori e treguar nga Olga njëmbëdhjetëvjeçare, e njohur dhe e admiruar nga të gjithë banorët e fshatit ku jeton, për talentin e saj të të treguarit. Përmes humorit, emocioneve dhe dhembshurisë, ky libër trajton temat e brishtësisë, të dobësisë dhe të papërsosmërisë, siç është përnjëmend natyra e njeriut.
Për lexuesit e të gjitha moshave.
Rreth përkthyesit
Albana Nexhipi
Albana Nexhipi lindi më 1978. Në vitin 2001 përfundoi studimet e larta për Gjuhë shqipe dhe letërsi dhe më 2004 studimet Master për Letërsi, në Fakultetin e Historisë dhe të Filologjisë, Universiteti i Tiranës. Gjatë vitit 2004 kreu specializimin pasuniversitar në lëmë të Letërsisë së krahasuar në Università per Stranieri, Peruxha, Itali. Në vitet 2004-2014 - gazetare, redaktore përgjegjëse, autore dokumentaresh dhe reportazhesh; nga viti 2009 - pedagoge në Universitetin Europian të Tiranës. Njohëse shumë e mirë e italishtes, Albana Nexhipi është përkthyese e disa librave: “Nina dhe misteri i notës Oktavë”, “Nina dhe Syri Sekret i Atlantidës”, “Nina dhe Numri i Artë”, “Nina dhe fuqia e Absinthiumit” nga Moony Witcher; “Mikesha gjeniale: fëmijëria, adoleshenca” nga Elena Ferrante; “Dje, sot, nesër” nga Sophia Loren; “Pas bukurisë: si mund ta përmirësojmë imazhin pa e tradhtuar veten” nga Willy Pasini dhe Maria Teresa Baldini; “Erosi dhe qytetërimi” nga Herbert Marcuse; “Homo videns: televizioni dhe postmendimi” (DITURIA, 2013) nga Giovanni Sartori; “Një histori shkodrane: flamujt e parë të anijeve tregtare shqiptare (1913-1914), Shpnesa e Shcypeniis (Shqiptarë të Trieshtit)” dhe “Jo vetëm ‘Hymni i Flamurit’: disa kuriozitete mbi himnet e tjera kombëtare shqiptare në ag’ të Pavarësisë” nga Paolo Muner.