#Booktuberishqiptar është çmim i promovuar nga Shtëpia Botuese Dituria, me mbështetjen e Qendrës Kombëtare të Librit dhe Leximit, dhe programit të Europës Krijuese.
Ky ishte edicioni i parë dhe ditën e djeshme, më datë 23 dhjetor, u zhvillua ceremonia ku u ndanë çmimet dhe u përgëzuan fituesit.
U lumtë dy nxënëseve të Institutit Arsimor Willson, në Tiranë, Besmira Kapllani dhe Nesara Fejzo, që merituan çmimin e parë për videon e tyre recensionuese për librin E BARDHA DHE E ZEZA, shkruar nga Malorie Blackman dhe përkthyer nga Virgjil Muçi. Çmimin e dytë e merituan nxënësit e shkollës Ismail Qemali në Tiranë. Videoja e tyre, një nxitje për të lexuar librin ANKTHI I PORTIERIT PARA PORTËS, shkruar nga Peter Handke e përkthyer nga Jonida Godole, ishte një bashkëpunim midis disa shokëve: Arbër Topi, Elisabeta Qosja, Frenklin Bejtja, Livia Qyra, Vanesa Ismaili, Paola Pesjaka (ideja: Paola Pesjaka). Urime të gjithëve.Mikela Dervishi, nxënëse e shkollës Kostandin Kristoforidhi në Elbasan meritoi çmimin e tretë, me videorecensionin për librin NGADALËSIA të Milan Kunderës, përkthyer nga Mirela Kumbaro. Urime për zgjedhjen e librit dhe videon e bukur.Ceremonia u zhvillua në Qendrën Kombëtare të Librit dhe Leximit dhe çmimet u ndanë nga drejtori i Shtëpisë Botuese Dituria, z. Petrit Ymeri, nga Alda Bardhyli, drejtore e QKLL, shkrimtari Gaqo Bushaka dhe studiuesja e letersisë, Anila Mullahu. Për nxënësit u shpërndanë libra dhuratë. Shtëpia Botuese Dituria falënderon shkollat “Ismail Qemali”, “Partizani”, instituti “Willson” (Tiranë); “Kostandin Kristoforidhi” (Elbasan); “Ali Demi” (Vlorë) dhe “Hydajet Lezha” (Lezhë), që morën pjesë në këtë konkurs. Falënderojmë në veçanti mësueset e letërsisë: Adriatike Lami, Teuta Berishaj, Luiza Mustafaraj, Jenla Godole, Adriatike Lami, Entela Kazazi, Lindita Isufaj, Yllka Çulo, Erolinda Prenga etj.Vitin e ardhshëm, Dituria do të njoftojë hapjen e edicionit të dytë të Booktuberit shqiptar ku do të përfshihen më shumë shkolla por edhe individë.
#Creativeeurope4books#QKLL#Shtepiabotuesedituria#Booktuberishqiptar#Çmimet
