“Askush nuk fliste për atë që kishim bërë gjatë luftës. E dinin të gjithë që nuk lejohej”.
Është një mëngjes i ftohtë janari, kur vijnë për të marrë Xhoana Stenlin nga shtëpia e saj e vogël në periferi të Londrës. Kush do ta kishte menduar! Xhoana ishte një mama e dashur, një gjyshe e ëmbël, e dhënë pas kopshtarisë… Dhe, atë mëngjes, dikush i trokiti në derë. E megjithëkëtë, duhej ta kishte pritur. Sepse, edhe në moshën tetëdhjeteshtatëvjeçare, nuk mund t’i shpëtosh së shkuarës…
Kembrixh, 1937. Në qytetin universitar ku vlojnë idetë dhe idealistët, Xhoana më në fund mund të marrë frymë e të studiojë. Dhe kur njihet me djaloshin simpatik, Leon, me origjinë ruse dhe të apasionuar pas politikës, dhe kushërirën e tij, ajo përfshihet në energjinë e dyshes dhe fillon një rrugëtim, që nuk do t’i kishte shkuar kurrë nëpër mend. Sepse Xhoana Stenli – gjyshja e këndshme angleze – ka një sekret të paimagjinueshëm: për vite me radhë, ajo ka qenë një spiune britanike e KGB-së, që transmetonte fshehurazi informacione për bombën atomike.
Bazuar në historinë e vërtetë të Melita Norwoodit, spiunes angleze të KGB-së, e zbuluar në vitin 1999, Xhoana e Kuqe është një dramë e paharrueshme spiunazhi dhe dashurie, por, mbi të gjitha, një histori që na tregon për zgjedhjet që bëjmë në jetë dhe pasojat e tyre të pashmangshme.
“Rooney i qaset kësaj historie të vërtetë në atë mënyrë që lexuesi ta përjetojë si dramën personale të Xhoanës. Ka dashuri, humbje, tradhti, miqësi dhe shumë sekrete për atë se si një person normal mund të tradhtojë vendin e vet. Ajo që godet në këtë histori, është se do ta kapni veten duke menduar nëse do të bënit pikërisht atë që bëri spiunia, në ato rrethana.”
The Bookbag
“Një roman brilant spiunazhi, me një fajtor të pamundur dhe një dramë emocionuese… plot tension, i shkruar me stil dhe shumë prekës.”
Eithne Farry Marie Claire