“Eksodi” është emri i një anijeje me të cilën një grup refugjatësh hebrej, të internuar nga anglezët në një kamp pëqendrimi në Qipro më 1947, arrin të arratiset dhe pas një sërë vështirësish, shkel në Tokën e Premtuar. Një roman historik i tejmbushur me pasion, me përpjekje, me shpresë dhe dashuri, “Eksodi” është libri më i famshëm i shkrimtarit hebreo-amerikan Leon Uris, është historia e rilindjes së një kombi pa tokë në kërkim të përjetshëm të një toke pa komb. I shkruar vetëm dhjetë vjet pas lindjes së Shtetit të Izraelit dhe i përkthyer në 56 gjuhë të botës, ky roman përshkruan luftën e një kombi të tërë për t’i shkulur rërës së shkretëtirës – dhe mbi të gjitha, urrejtjes së njerëzve – një pëllëmbë tokë mbi të cilën mund të ringjallet.