Tetor 1918. Pasi i mbijetuan masakrës së Luftës së Madhe, në vitin 1918, Alberti dhe Eduardi gjenden të margjinalizuar nga shoqëria. Albertin, një punonjës modest dhe i pasigurt që ka humbur gjithçka, e shpëton në fushën e betejës, në ditët e fundit të konfliktit, Eduardi, një djalë i pasur, i guximshëm dhe i çuditshëm, me dhunti të jashtëzakonshme artistike. Pas lirimit nga detyra, të dënuar me një jetë të mjerueshme dhe të përjashtuar nga çdo gjë, ata vendosin të hakmerren duke shpikur një mashtrim kolosal në dëm të vendit të tyre, duke e ngritur sakrilegjin në statusin e një vepre arti.
Mirupafshim atje lart është një roman emocionues dhe i guximshëm që rrëfen trazirat e periudhës së parë të pasluftës, iluzionet e armëpushimit, hipokrizinë e Shtetit që lëvdon të vdekurit, por harron të gjallët, neverinë e ngritur në virtyt.
Në një atmosferë të errët dhe vizionare, Pierre Lemaitre përshkruan tragjedinë e madhe të një brezi të humbur, me një talent dhe mjeshtëri të tillë, që e futin këtë shkrimtar në traditën e atyre romancierëve të zot, nga Dumas-i te Victor Hugo, ku pasioni që çlirohet nga historitë e mëdha bashkohet me ekselencën letrare.

“Do të ndjeni indinjatën e autorit… Kush përfiton vërtet nga lufta? Mashtruesit, hakmarrësit dhe maskarenjtë. Mashtrimi i madh është sa politik aq edhe pikaresk.”                                                                                                                                                                                                                                                                                                                                                                                                                                                                                                                                      Figaro

“Pierre Lemaitre është shkrimtari bashkëkohor më origjinal dhe i paparashikueshëm. Ky është një roman lufte, madje i pasluftës. Një roman pa Zot dhe pa Atdhe që nëpërkëmb si të rënët, edhe të mbijetuarit në luftë, një roman që përmbledh kuptimin thelbësor, të thellë dhe makabër të Nëntëqindës, që ishte shekulli  i masakrës së industrializuar (me lotët e krokodilit nga pas).”
                                                                                                                                                                                                                                                            La Lettura